‘एक फुल आणि दोन हाफला आंदोलकांची भेट घ्यावीशी वाटली नाही. आंदोलकांवर जो शासकीय अत्याचार झाला त्यावर केवळ निषेध करून होणार नाही. जालन्यात ‘शासन आपल्या दारी’ कार्यक्रम घ्यायचा होता म्हणून आंदोलन चिरडण्याचा निर्णय घेतला गेला. ‘इंडिया’ची बैठक सुरू असताना पत्रकार परिषद घ्यायला त्यांना वेळ आहे; पण आंदोलक बसले तिकडे भेट द्यायला कोणालाच वेळ नाही. बारसू ग्रामस्थांवर, वारकऱ्यांवर आणि शुक्रवारी मराठा समाजाच्या आंदोलकांवर अत्याचार झाला. सरकारच्या आदेशाशिवाय पोलिस असे वागूच शकत नाहीत. करोनाकाळात जीवाची बाजी लावून ज्या पोलिसांनी महाराष्ट्र वाचविला ते पोलिस एवढे राक्षस होऊ शकतात का,’ असा प्रश्न त्यांनी केला.
‘गणेशोत्सवामध्ये तुम्ही नेमके अधिवेशन कसे बोलावता? तुमचे मुहूर्त काढणारे ज्योतिषी आणले तरी कुठून? हिंदूच्या उत्सवामध्ये विशेष अधिवेशन घेण्यामागे तुमचे नेमके काय अडले आहे? पितृपक्षात का अधिवेशन घेत नाही,’ अशी विचारणाही त्यांनी यावेळी केली. ‘ही हुकूमशाही चिरडून टाकण्यासाठी इंडिया म्हणून आम्ही एकत्र आलो आहोत. देशाचे रक्षण करण्यासाठी आमच्यासोबत जे येतील, अगदी मेहबूबा मुफ्ती असल्या तरी देशाच्या रक्षणासाठी सोबत घेऊ. आम्हाला देशात हुकूमशहा जन्माला येऊ द्यायचा नाही,’ असेही त्यांनी ठणकावून सांगितले.
ईडी सीबीआयला राजकारणी चळाचळा कापतात, मोदी-शहांना उद्धव कसे नडतात? ‘इंडिया’मध्ये ठाकरेंचे कौतुक
‘सन २०१४ दरम्यान ‘चाय पे चर्चा’ हा शब्द प्रचलित झाला होता. आता ‘होऊन जाऊ दे चर्चा..’ लोकांच्या मनात जे काही सुरू आहे त्याला धुमारे फोडावे लागतील. नुसत्या बैठका घेऊ नका, तर शेतकऱ्यांच्या बांधावर जा, सरकारच्या ज्या काही योजना आहेत, त्यामधून शेतकऱ्यांना कोणता लाभ झाला, त्यांना योजनेचे पैसे मिळाले का, मुलांना नोकरी मिळाली का, शिक्षणाची व्यवस्था झाली का, याची माहिती घेऊन त्यांना वस्तुस्थितीची जाणीव करून द्या. कारण लोकांचा सरकारवरचा विश्वास उडाला आहे; पण त्यांच्या जाहिरातींवर विश्वास आहे, आपल्याला नेमके हेच खोडून काढायचे आहे. शिवसेना निष्ठेवर चालते. शिवसेना हिमतीवर, जिद्दीवर चालते,’ असा विश्वासही ठाकरे यांनी व्यक्त केला.
