गिरीश बापट यांच्या निधनानंतर पुणे भाजपमध्ये पुणे लोकसभेची निवडणूक लढवण्यासाठी अनेक नावांच्या चर्चा सुरू झाल्या त्यामध्ये माजी मुख्यमंत्री देवेंद्र फडणवीस, माजी महापौर मुरलीधर मोहोळ, माजी शहराध्यक्ष जगदीश मुळीक, माजी खासदार संजय काकडे, गिरीश बापट यांच्या सुनबाई स्वरदा बापट, राष्ट्रीय स्वयंसेवक संघाचे माजी प्रचारक सुनील देवधर आणि आता तर खुद्द पंतप्रधान नरेंद्र मोदी यांच्या नावाची चर्चा आहे. त्यामुळे गेले कित्येक वर्ष आपली एक हाती सत्ता पुणे भाजपवर गाजवणारे गिरीश बापट यांच्या निधनानंतर पुण्यात भाजपला चेहरा शिल्लक राहिला नाही का, अशी चर्चा राजकीय वर्तुळात सुरू आहे.
माजी शहराध्यक्षापासून पंतप्रधानांपर्यंत नावाची चर्चा
गिरीश बापट यांच्या निधनापूर्वीच देवेंद्र फडणवीस यांच्या नावाची पुणे लोकसभेसाठी चर्चा सुरू होती. ब्राह्मण महासंघाने तर भाजपचे राष्ट्रीय अध्यक्ष जेपी नड्डा यांना पत्र लिहून देवेंद्र फडणवीस यांना पुण्याच्या खासदारकीची संधी द्यावी अशी मागणी केली होती. त्यानंतर देवेंद्र फडणवीस हे पुण्याचे पालकमंत्री होणार असल्याचे देखील चर्चा सुरू झाल्या. मात्र, स्वतः देवेंद्र फडणवीस यांनी या सर्व चर्चांचे खंडन केले. देवेंद्र फडणवीस यांच्या नावाला त्यावेळी स्वतः गिरीश बापट यांनी पसंती दिली होती. देवेंद्र फडणवीस यांना पुण्याचे प्रतिनिधित्व करण्याची संधी मिळाली तर आपल्याला आनंदच होईल अशी प्रतिक्रिया त्यावेळेस गिरीश बापट यांनी दिली होती.
देवेंद्र फडणवीस यांच्यानंतर माजी महापौर मुरलीधर मोहोळ यांच्या देखील नावाची चर्चा सुरू आहे. गिरीश बापट यांच्यानंतर पुण्यामध्ये भाजपात जर मास सपोर्ट असणारा कोणी नेता असेल तर तो म्हणजे मुरलीधर मोहोळ असं मोहळांकडे पाहिलं जातं. मुरलीधर मोहोळ यांनी महापौर असताना कोरोना काळामध्ये केलेल्या कामाची स्तुती अगदी तत्कालीन विरोधक आणि उपमुख्यमंत्री अजित पवार यांच्यापासून सर्वच नेत्यांनी केली होती. इतकच नाही तर भाजपचे प्रदेशाध्यक्ष चंद्रशेखर बावनकुळे यांनी देखील मुरलीधर मोहोळ हे सर्वाधिक सपोर्ट असलेले नेते असल्याचं जाहीर करून एका प्रकारे अप्रत्यक्षरीत्या पुण्याची लोकसभा निवडणूक लढवण्याच्या शर्यतीत मोहोळ हे सर्वात पुढे असल्याचं जाहीरच करून टाकलं होतं. पुण्याचे खासदार होण्याची मुरलीधर मोहोळ यांची इच्छा काही लपून राहिलेली नाही. त्यानुसार त्यांची मोर्चेबांधणी सुरूच आहे. नुकतीच मोहोळ यांच्याकडे पुणे लोकसभा मतदारसंघाच्या प्रमुख पदाची जबाबदारी देखील आली आहे.
Loksabha Election 2024 : मुरलीधर अण्णांचा पत्ता कट? डाव्यांच्या २५ वर्षांच्या सत्तेला सुरुंग लावणारा नेता पुणे लोकसभेचा उमेदवार?
मोहोळ यांच्या बरोबरीनेच पुणे भाजपचे माजी शहराध्यक्ष जगदीश मुळीक यांच्या नावाची देखील चर्चा आहे. २०१४ मध्ये झालेल्या विधानसभा निवडणुकीत जगदीश मुळीक यांनी वडगाव शेरी मतदार संघातून सुनील टिंगरे यांचा पराभव केला होता. कालांतराने जगदीश मुळीक यांना शहराध्यक्ष पदाची मोठी जबाबदारी मिळाली त्या काळात जगदीश मुळीक यांनी शहरभर संपर्क वाढवून आपण खासदारकीसाठी कसे योग्य आहोत हे पक्षश्रेष्ठींना दाखवण्याचा प्रयत्न केला. इतकंच काय तर गिरीश बापट यांच्या निधनानंतर लागलेल्या श्रद्धांजलीच्या बॅनरवर भावी खासदार म्हणून जगदीश मुळीक यांचा उल्लेख करण्यात आला होता. प्रचंड टीका झाल्यानंतर हा बॅनर हटवण्यात आला.
गिरीश बापट यांच्या निधनानंतर त्यांच्या सूनबाई स्वरदा बापट यांच्या नावाची चर्चा सुरू झाली. कसबा विधानसभा पोटनिवडणुकीत ब्राह्मण समाजाच्या नाराजीचा फटका भाजपला बसला होता. त्यामुळे पुणे लोकसभा निवडणुकीत असं काही होऊ नये यासाठी स्वरदा बापट यांच्या नावाची चर्चा सुरू झाली. मात्र, बापट यांच्या कुटुंबातून कधी यावर दावा करण्यात आला नाही. पक्ष देईल ती जबाबदारी आपण पार पाडू अशा पद्धतीने बापट कुटुंब बोलत राहिले. स्वरदा बापट यांनी सांगली महापालिकेत नगरसेवक पद भूषवला असून सध्या त्या पुणे भाजपच्या शहर उपाध्यक्ष म्हणून काम पाहत आहेत.
या सगळ्यांमध्ये माजी खासदार संजय काकडे यांनी वेळोवेळी आपणच पुणे लोकसभा निवडणुकीसाठी कसे योग्य आहोत हे बोलून दाखवलेला आहे. २०१७ च्या निवडणुकीत पुणे महानगरपालिकेमध्ये भाजपची सत्ता आणण्यात संजय काकडे यांचा मोठा दावा होता. २०१७ च्या महापालिका निवडणुकीपूर्वीच महापालिकेत भाजपचे १०० पेक्षा जास्त नगरसेवक निवडून येण्याचं भाकीत संजय काकडे यांनी केलं होतं आणि त्याप्रमाणे कामगिरी करत त्यांनी भाजपचे १०० नगरसेवक देखील निवडून आणले. पक्षात संजय काकडे यांचे वजन वाढत राहील २०१९ च्या लोकसभा निवडणुकीत संजय काकडे हे पुणे लोकसभेची निवडणूक लढवण्यासाठी इच्छुक होते. मात्र त्यावेळी पक्षाने गिरीश बापट यांना उमेदवारी दिली होती. त्यानंतर काही वेळ बापट विरुद्ध काकडे असा संघर्ष पुणे शहराने पाहिला. आता कितीच बापट यांच्या निधनानंतर पुन्हा एकदा संजय काकडे सक्रिय झाले असून त्यांनी खासदारकीवर दावा ठोकला आहे.
स्थानिक भाजपचे नेतेच नाही तर भाजपकडून राष्ट्रीय स्वयंसेवक संघाचे माजी प्रचारक सुनील देवधर यांच्या नावाची सुद्धा चाचपणी झाल्याची चर्चा आहे. पुण्याचा जन्म असलेल्या सुनील देवधर यांच्या नावाची चर्चा गेल्या काही दिवसांपासून सातत्याने सुरू आहे. भारताच्या ईशान्य भागात राष्ट्रीय स्वयंसेवक संघ आणि भाजपचे संघटन वाढवण्यात सुनील देवधर यांचा मोठा वाटा आहे. त्याचबरोबर वाराणसी मध्ये पंतप्रधान नरेंद्र मोदी यांच्या लोकसभा निवडणुकीत देखील सुनील देवधर यांनी मोठं काम केलं होतं. कसबा निवडणुकीत ब्राह्मण समाजाच्या नाराजीचा फटका बसल्यानंतर राष्ट्रीय स्वयंसेवक संघाचा एक नवा चेहरा म्हणून सुनील देवधर यांच्या नावाची पुणे लोकसभा निवडणुकीसाठी चर्चा सुरू झाली. सुनील देवधर यांच्या नावाची चाचपणी थेट दिल्ली मधून सुरू असल्याच्या देखील माहिती आहे.
सुनील देवधर यांच्या नावाची चर्चा झाल्यानंतर अवघ्या दोनच दिवसात थेट पंतप्रधान नरेंद्र मोदी पुण्यामधून लोकसभा निवडणूक लढवणार असल्याची चर्चा सुरू झाली. पंतप्रधान नरेंद्र मोदी यांचे पुण्यातील वाढते दौरे त्याचप्रमाणे गृहमंत्री अमित शहा यांच्या देखील पुणे शहरातील वाढते दौरे हे या चर्चांना खतपाणी घालणारे होते. इतकंच काय तर भाजपचे उपाध्यक्ष संजय काकडे यांनी पंतप्रधान नरेंद्र मोदी यांना पत्र लिहून आपण पुण्यातून लोकसभेची निवडणूक लढवावी अशी विनंती केली. मात्र भाजपकडून या सर्व चर्चांचे खंडन करण्यात आले.
असं असलं तरी एका जागेसाठी भाजपमधील इतके सारे दिग्गज यांच्या नावांची चर्चा सातत्याने सुरूच आहे. त्यामुळे दिवंगत खासदार गिरीश बापट यांच्यानंतर पुणे भाजपचा चेहरा कोण हे भाजपमध्ये स्पष्ट होत नाही. स्थानिक नेत्यांमधील चढाओढ हे याला मोठं कारण मानलं जातं. आता देशभरात लोकसभा निवडणुकीचे वारे वाहू लागले आहेत आणि अशात पुणे भाजपचा चेहरा कोण असणार यावरून भाजपमध्ये मोठा संघर्ष पाहायला मिळाला तर नवल वाटायला नको.
