शेतकरी मेळाव्यात खा.रणजितसिंह निंबाळकरांच नाव वगळले
शंकर सहकारी साखर कारखान्याचा विस्तारीकरण व शेतकरी गुरुवारी ७ सप्टेंबर रोजी उपमुख्यमंत्री देवेंद्र फडणवीस आणि पालकमंत्री राधाकृष्ण विखे पाटील यांच्या उपस्थितीत होत होणार होता. पण राज्यातील परिस्थितीमुळे हा कार्यक्रम पुढे ढकलण्यात आला आहे. पण नंतर होणाऱ्या कार्यक्रमासाठी तब्बल ६४ मान्यवरांना निमंत्रणाचे पत्र देण्यात आले आहे. यातून भाजप खासदार रणजित निंबाळकर यांचे नाव वगळण्यात आल्याने पुन्हा एकदा मोहिते पाटील आणि निंबाळकर यांच्यातील संघर्ष उघड झालेला आहे.
दोन वर्षांपासून निंबाळकर व मोहिते पाटलांमध्ये संघर्ष सुरू
माढा लोकसभा तसा राष्ट्रवादीचा बालेकिल्ला म्हणून ओळखला जात होता. राष्ट्रवादीचे अध्यक्ष शरद पवार यांनी माढा लोकसभा मतदारसंघाच प्रतिनिधित्व केल्यानंतर २०१४ येथून विजयसिंह मोहिते पाटील खासदार म्हणून विजयी झाले होते. राष्ट्रवादीत विजयसिंह मोहिते पाटलांचे खच्चीकरण केल्याने २०१९मध्ये मोहिते पाटील यांनी पंतप्रधान नरेंद्र मोदी यांच्या उपस्थितीत भाजपमध्ये प्रवेश केला. २०१९ भाजपकडून माढ्यातून रणजितसिंह नाईक निंबाळकर यांना उमेदवारी देण्यात आली. भाजपचे रणजित निंबाळकर माढा लोकसभा मतदारसंघातुन लाखभर मताच्या फरकाने विजयी झाले. सुरुवातीला मोहिते आणि निंबाळकर यांच्यात मधूर संबंध होते. मात्र, अलीकडच्या दोन वर्षात निंबाळकर आणि मोहिते यांच्यात वाद सुरु झाल्याने दोन्ही नेते एकमेकांना टाळण्याचा प्रयत्न करू लागले आहेत.
रणजितसिंह निंबाळकर व त्यांच्या समर्थकांना मोहिते पाटलांनी वगळले
आगामी लोकसभा निवडणुकीत माढा लोकसभेच्या २०२४ मोहिते पाटील यांना उमेदवारी हवी अशी मागणी समर्थकांतून होत आहे. रणजितसिंह नाईक निंबाळकर माढा मतदारसंघात आपली ताकद वाढवू लागले आहेत. अजित पवार राज्यातील सत्तेत सामील झाल्यानंतर राष्ट्रवादीचे आमदार बबनदादा शिंदे व करमाळाचे आमदार संजयमामा शिंदे हे रणजितसिंह निंबाळकरांना समर्थन करत आहेत. निंबाळकर यांच्याकडून पराभूत झालेले करमाळ्याचे आमदार संजयामामा शिंदे यांनी निंबाळकर याना मोठ्या मताधिक्याने निवडून आणण्याची घोषणा केली आहे. त्यासोबत माढ्याचे राष्ट्रवादी आमदार बबनदादा शिंदे यांनीही रणजित निंबाळकर याना मोठ्या मताधिक्याने निवडून देण्याची भूमिका आहे. शंकर कारखान्याच्या विस्तारीकरण कार्यक्रमात मोहिते पाटील यांनी निंबाळकर यांचे स्थानिक विरोधक रामराजे निंबाळकर यांच्यासह जवळपास ६४आजी-माजी आमदार, खासदार आणि पदाधिकाऱ्यांना कार्यक्रमाला निमंत्रित केले आहे. मात्र,यातून खासदार रणजित निंबाळकर आणि त्यांना साथ देणारे माढा आमदार बबनदादा शिंदे, करमाळा आमदार संजयामामा शिंदे यांना मात्र वगळले आहे.
इंडिया आघाडीचा माढा मतदारसंघावर डोळा
इंडिया आघाडीकडे माढा लोकसभेसाठी उमेदवारच नाही.त्यामुळे विरोधकांकडून उमेदवारीचा शोध सुरु झाला आहे. काँग्रेसने माढा लोकसभेवर दावा करत जिल्हाध्यक्ष डॉ. धवलसिंह मोहिते पाटील यांचे नाव पुढे केले आहे. उद्धव ठाकरे गटाकडून राज्याचे प्रवक्ते प्रा. लक्ष्मण हाके हे धनगर आणि ओबीसी मतांच्या जोरावर माढा लोकसभेवर दावा करण्याच्या तयारीत आहेत. शरद पवार यांनी शेकाप मधील बाळासाहेब पाटील यांना राष्ट्रवादीत प्रवेश देत त्यांना उमेदवारी देण्यासाठी पाटील यांना राष्ट्रवादीत प्रवेश देत त्यांना उमेदवारी देण्यासाठी प्रयत्न सुरु केले आहेत.
भाजपच्या अडचणीत वाढ होण्याची भीती
माढा मतदार संघावर सर्वात मजबूत दावा हा विद्यमान खासदार रणजित निंबाळकर यांचा आहे. अजित पवार सत्तेत आल्याने भाजपची ताकद डबल झाली आहे. आता भाजपमध्ये मोहिते पाटील आणि खासदार रणजित निंबाळकर यांच्यातील संघर्ष तातडीने न मिटल्यास भाजपच्या अडचणीत वाढ होण्याची शक्यता राजकीय वर्तुळात वर्तवली जात आहे.उपमुख्यमंत्री देवेंद्र फडणवीस यांच्या समोर ही गटबाजी येणार असल्याने फडणवीस माढ्यातील जागा राखण्यासाठी कोणता कानमंत्र देणार यावर माढ्याचे भवितव्य अवलंबून असणार आहे.
