संघातर्फे दरवर्षी परिवारातील संघटनांची समन्वय बैठक घेतली जाते. हरियाणामधील पानिपत जिल्ह्यात १२ ते १४ मार्च दरम्यान झालेल्या अखिल भारतीय प्रतिनिधी सभेत समन्वय बैठकीची तारीख व स्थान निश्चित करण्यात आले होते. त्यानुसार ही बैठक पुण्यातील सर परशुरामभाऊ महाविद्यालयात पार पडणार आहे. मुख्य बैठक १४ ते १६ सप्टेंबरदरम्यान होणार असली तरी त्यापूर्वी दोन दिवस व त्यानंतर दोन दिवसही विशेष बैठका होणार आहेत. त्यासाठी स. प. महाविद्यालयाचे सभागृह, मैदानाची व्यवस्था, निवासव्यवस्थेच्या कामाने वेग घेतला आहे.
काय असते समन्वय बैठक
संघ परिवारातील मुख्य ३५ हून अधिक संस्थांच्या प्रतिनिधींची ही बैठक असते. या बैठकीत सरसंघचालक व सरकार्यवाहांच्या उपस्थितीत या संघटनांचे राष्ट्रीय अध्यक्ष, महामंत्री (सरचिटणीस) उपस्थित असतात. हे प्रतिनिधी आपल्या संघटनेचा कार्यअहवाल सादर करतात. त्यानंतर साधकबाधक चर्चा होऊन पुढील कार्याची दिशा आणि परिवारातील संघटनांच्या समन्वयाची कार्यपद्धती निश्चित केली जाते.
बैठकीचे महत्त्व वाढले
रा स्व संघाची राष्ट्रीय समन्वय बैठक १४ ते १६ सप्टेंबर दरम्यान होणार आहे. मात्र, केंद्र सरकारने १८ ते २२ सप्टेंबर दरम्यान संसदेचे विशेष अधिवेशन बोलावले आहे. या अधिवेशनाच्या पार्श्वभूमीवर संघाची समन्वय बैठक होणार असल्याने बैठकीचे महत्त्व वाढले आहे.
पंतप्रधानांचा पुणे दौरा?
पंतप्रधान नरेंद्र मोदी १४ ते १७ सप्टेंबर दरम्यान एक दिवस पुणे दौऱ्यावर येणार असल्याची जोरदार चर्चा आहे. याबाबत प्रचंड गोपनीयता बाळगली जात आहे. अर्थात, पंतप्रधान मोदी या बैठकीला उपस्थित राहण्याची शक्यता नाही, असा सूत्रांचा दावा आहे. मात्र, पूर्वनियोजन नसताना अचानक हा दौरा ठरत असल्याने त्याबाबतही चर्चांना उधाण आले आहे
