तत्कालीन महापौर सतीश कुलकर्णी यांनी कारकीर्दीच्या शेवटच्या टप्प्यात नाशिकमध्ये आयटी पार्क करण्याची घोषणा केली होती. आडगाव शिवारात पालिकेची १० एकर जागा आरक्षित असून, या जागेच्या अवतीभवती असलेल्या जवळपास शंभर एकर जागा आयटी पार्कसाठी उपलब्ध करून देण्याचे नियोजन होते. त्यासाठी महासभेने ठराव करत या ठिकाणी केंद्रीय सूक्ष्म, मध्यम लघु उद्योगमंत्री नारायण राणेंच्या उपस्थितीत कुदळही मारण्यात आले होते.
उत्तर महाराष्ट्रातील छोटे आयटी पार्कचे युनिट एकाच जागेत स्थापन करण्याबरोबरच मुंबई, बेंगळुरू, कोलकत्ता, चेन्नई, पुणे, हैदराबाद या शहरांमधील आयटी कंपन्यांना नाशिकमध्ये निमंत्रित करून काही प्रमाणात गुंतवणूक करण्याच्या उद्देशासाठी आयटी कॉन्क्लेव्ह आयोजित करण्यात आली होती. परंतु प्रशासकीय राजवट लागू झाल्यानंतर आयटी पार्क प्रकल्प लाल फितीत अडकला. या आयटी पार्कसाठी भाजपकडून पाठपुरावा सुरू असतानाच, शिंदे गटाचे खासदार हेमंत गोडसे यांनी अक्राळेत शंभर एकर जागा संपादित करण्याची मागणी उद्योगमंत्री सांवत यांच्याकडे केली. त्याला सावंत यांनी तत्काळ प्रतिसाद देत एमआयडीसी शेजारी १०० एकर जागा देण्याची घोषणा केली.
वादाची ठिणगी
राज्यात मुख्यमंत्री एकनाथ शिंदे यांच्या नेतृत्वाखाली महायुतीचे सरकार सत्तेत आल्यानंतर विकासकामे दाखविण्याची स्पर्धा तिन्ही पक्षांमध्ये सरू झाली. त्याचाच फटका आता आडगाव आयटी पार्कलाही बसत आहे. आडगाव शिवारात भाडेतत्तावर जागा, आयटी कंपन्यांसाठी महत्त्वाची ठरणारी जवळ असलेली विमानसेवा, महामार्गापासून शंभर मीटर अंतर, तर मेडिकल कॉलेज व रुग्णालय अशा सुविधा उपलब्ध आहेत. त्यामुळे सदरची जागा योग्य असतानाही याकडे दुर्लक्ष करत अक्राळे येथील जागेचा अट्टाहास कशासाठी, असा सवाल आता भाजपच्या नेत्यांकडून उपस्थित केला जात आहे. भाजप आमदारांकडूनदेखील यासाठी पाठपुरावा केला जात आहे.
आडगाव शिवारातील आयटी पार्कसाठी आवश्यक त्या सुविधा उपलब्ध असून, महापालिका हद्दीतच तो झाला पाहिजे. केंद्र सरकारदेखील यासाठी शंभर कोटी रुपये देण्यास तयार आहे. यामुळे शहराचा विकास होऊन रोजगारालाही चालना मिळणार आहे.
-सतीश कुलकर्णी, माजी महापौर.
