सांगली, दि. 28 (जि. मा. का.) : जिल्ह्यातील दोन आत्महत्याग्रस्त शेतकऱ्यांच्या वारसांना शासकीय मदतीचा धनादेश कामगार मंत्री तथा जिल्ह्याचे पालकमंत्री डॉ. सुरेश खाडे यांच्या हस्ते आज देण्यात आला. डॉ. खाडे यांनी खंडेराजुरी (ता. मिरज) येथील आत्महत्याग्रस्त शेतकरी श्रीकृष्ण पाटील व कोंगनोळी (ता. कवठेमहांकाळ) येथील आत्महत्याग्रस्त शेतकरी सागर वावरे यांच्या कुटुंबियांचे त्यांच्या गावात प्रत्यक्ष जावून सांत्वन करत धीर दिला. यावेळी खंडेराजुरी येथे मिरजच्या तहसीलदार अपर्णा मोरे धुमाळ, कोंगनोळी येथे कवठेमहांकाळच्या तहसीलदार अर्चना कापसे यांच्यासह स्थानिक व्यक्ती, कर्मचारी उपस्थित होते.
खंडेराजुरी येथे श्रीमती सीमा श्रीकृष्ण पाटील (आत्महत्याग्रस्त शेतकरी यांच्या पत्नी) यांना व कोंगनोळी येथे सुनिता लक्ष्मण वावरे (आत्महत्याग्रस्त शेतकरी यांच्या आई) यांना महाराष्ट्र शासनामार्फत अर्थसहाय्य म्हणून प्रत्येकी एक लाख रूपयांचा धनादेश देण्यात आला.
राज्य शासनाकडून अवकाळी पावसाने होणाऱ्या नुकसानीची मर्यादा दुसऱ्यांदा ३ हेक्टरपर्यंत वाढवण्यात आली असल्याचे सांगून पालकमंत्री डॉ. सुरेश खाडे म्हणाले, एका महिन्यापूर्वी आपण भेट देऊन वावरे कुटुंबियांचे सांत्वन केले. आज मदतीच्या धनादेशाच्या माध्यमातून आपण या कुटुंबाच्या पाठिशी ठामपणे उभे आहोत. तसेच, त्यांचे घर पावसाने पडले असून, त्याच्या दुरूस्तीसाठीही मदत देण्याची व्यवस्था करण्याचे निर्देश त्यांनी यावेळी दिले. अडचणीच्या प्रसंगी आपण त्यांच्या सोबत असल्याचे त्यांनी सांगितले. यावेळी सुनिता वावरे यांनी राज्य शासनाने मदत दिल्याबद्दल आभार व्यक्त केले.
000
