एसटी अपघातांचे सत्र सुरूच! बसमध्ये ५० ते ५५ प्रवाशी; गाडीचे अचानक तुटले पाटे अन् अनर्थ…

नाशिक: जिल्ह्यातील नांदगाव तालुक्यात बसचा अपघात झाल्याची घटना घडली असून या अपघातात बसमधील १४ ते १५ प्रवासी जखमी झाले आहेत. नाशिकच्या नांदगाव तालुक्यातील जामदरी फाटा ते साकुरी फाटा दरम्यान गिरणा डॅम नांदगाव बसचे पाटे तुटून बस रस्त्याच्या कडेला नाल्यात उतरल्याने अपघात झाला. बसमधील १४ ते १५ विद्यार्थी आणि प्रवासी जखमी झाले असून प्रवाशांना नांदगाव ग्रामीण रुग्णालयात हलवविण्यात आले आहे.
अनर्थ टळला! समोरील वाहनाने दिली हूल; बसचालकाने राखले प्रसंगावधान, अन् वाचले प्रवाशांचे प्राण
मिळालेल्या माहितीनुसार, बस क्रमांक एमएच. १४ बीटी ३८०६ ही बस गिरणा डॅमकडून नांदगावकडे येत होती. ही बस जामदरी फाट्याजवळ आली असता बसचे पाटे तुटल्याने हा अपघात झाला झाल्याचे सांगितले जात आहे. या बसमध्ये अंदाजे ५० ते ५५ प्रवाशी होते. त्यामध्ये शाळकरी मुले आणि इतर प्रवाशांचा मोठ्या प्रमाणावर समावेश होता. या बसमधील सर्व शाळकरी मुले चाकोरी येथील कर्मवीर भाऊसाहेब विद्यालयातील असल्याची माहिती समोर आली आहे. या अपघातात शाळकरी मुले आणि प्रवाशांसह चालक शांताराम सोनवणे आणि वाहक योगेश गरुड हे किरकोळ जखमी झाले असून त्यांच्यावर नांदगाव येथील ग्रामीण रुग्णालयात उपचार सुरु आहेत. तर अपघातस्थळी बघ्यांची मोठ्या प्रमाणावर गर्दी झाली.

एसटीचा अपघात झाल्याचे पाहून परिसरातील नागरिकांनी घटनास्थळी धाव घेऊन मिळेल त्या वाहनाने जखमींना रुग्णालयात आणले. काहींना डोक्याला तर काहींना पायाला मार लागला असून सुदैवाने अपघातात जीवित हानी झाली नाही. मात्र गेल्या काही दिवसांपासून एसटी महामंडळाच्या बसचे अपघात झाल्याचे प्रमाण वाढलेले पाहायला मिळत आहे. विशेष करून ग्रामीण भागाच्या बस जास्तच खराब झाल्या असून त्या बसेसचा वारंवार अपघात होत असल्याच्या घटना समोर येऊ लागल्या आहेत. त्यामुळे लवकरात लवकर एसटी महामंडळाने बस दुरुस्ती करावी, अथवा नवीन बसेस आपल्या ताफ्यात दाखल कराव्या, अशी मागणी ग्रामीण भागातील नागरिक करू लागले आहेत.