साहेब वाईट परिस्थिती आहे, काम बंद करू नका; पाण्यासाठी शेतकऱ्याने धरले अधिकाऱ्याचे पाय, तरीही…

सांगली: कायम दुष्काळी असलेल्या जत तालुक्यातील माडग्याल तलावात चर पाडून पाणी सोडण्याच्या शेतकऱ्यांच्या मागणीला अनेक वर्षानंतर यश आले आहे. खासदारांनी जेसीबी उपलब्ध करून दिला आणि आज काम सुरू करताच प्रशासनाच्या अधिकाऱ्यांनी सदरचे काम बंद पाडले. चर खुदाई करून कॅनॉलमधून पाणी तलावात सोडायच्या कामाला सुरूवात झाली. परंतु वनविभागाने हे काम बंद पडले. यावेळी शेतकरी अश्रू ढाळत अधिकाऱ्यांच्या पाय पडले.
प्रकल्पाची घोषणा; मात्र अमंलबजावणी नाही, गाव २३ वर्ष प्रतिक्षेत, आता ग्रामस्थ गुरांसह बसले उपोषणाला
मात्र या वन विभागाच्या अधिकाऱ्यांना शेतकऱ्यांची दया आली नाही. उलट प्रशासकीय कारण सांगून हे काम बंद पाडले. यामुळे परिसरातील शेतकरी संतप्त झाले आहेत. सांगली जिल्ह्यातील जत तालुका हा कायम दुष्काळी तालुका आहे. या वर्षी पर्जन्यमान कमी झाल्याने जत पूर्व भागातील गावांमध्ये दुष्काळाची परिस्थिती निर्माण झाली आहे. यातील काही गावात टँकरद्वारे पाणी पुरवठा करण्यात येत आहे. माडग्याळसह सात गावांना म्हैसळ योजनेतून पाणी मिळावे म्हणून मायथळ कॅनॉलमधून चर काढून माडग्यालच्या तलावात पाणी सोडावे, अशी शेतकऱ्यांची गेल्या तीन वर्षापासून मागणी होती. त्यास अनुसरून जिल्हा बँकेचे संचालक जमदाडे यांनी खासदार संजय पाटील यांच्याकडे पाठपुरावा करून चर खुदाईसाठी शासनाच्या मशनिरी उपलब्ध झाल्या.

खासदार फंडातून डिझेलसाठी १२ लाखांचा निधी मिळाल्यावर या कामाला काल प्रत्यक्षात सुरुवात झाली. मात्र, आज दुसऱ्याच दिवशी वन विभागाने सदरची जागा ही आमची आहे. म्हणून जागेवर येऊन काम बंद पाडले. यावेळी शेतकऱ्यांनी त्यांच्यासमोर आपली कैफियत मांडत रडू लागले. साहेब खूप वाईट परिस्थिती आहे. काम बंद करू नका. गेल्या अनेक वर्षापासून आम्ही पाण्याची वाट पाहतोय, अशी विनवणी करत अधिकाऱ्यांचे पाय धरले. मात्र, वन विभागांनी काम सुरू होऊ दिले नाही. त्यामुळे ४०० हून अधिक शेतकरी माळावर बसून आहेत. जोपर्यंत हा प्रश्न सुटत नाही तोपर्यंत आम्ही इथून उठणार नाही, अशी भूमिका शेतकऱ्यांनी घेतली आहे.